OBRADOIRO DE COCIÑA: 4º EP ELABORA... CROQUETAS!

O alumnado de 4º de Educación Primaria converteuse en auténticos cociñeiros e cociñeiras grazas a un obradoiro de cociña celebrado no comedor escolar.

Da man das nosas cociñeiras, o grupo coñeceu de primeira man os ingredientes necesarios para elaborar unhas deliciosas croquetas. Pero non só cociñaron: tamén puxeron en práctica as matemáticas, calculando as cantidades precisas para preparar a masa. Foi unha excelente oportunidade para comprobar como as aprendizaxes da aula teñen aplicación directa na vida cotiá.

Durante toda a actividade destacou o traballo colaborativo. O alumnado organizouse, axudouse mutuamente e participou con entusiasmo en cada tarefa, demostrando responsabilidade, compañeirismo e moitas ganas de aprender.

O resultado foi unha experiencia moi completa, na que se mesturaron aprendizaxe, convivencia e diversión… e, por suposto, unhas croquetas feitas con moito agarimo.

Compartimos a continuación algunhas imaxes.

A NOSA COCIÑEIRA NAS "XORNADAS DE RESTAURACIÓN COLECTIVA E CANALES CORTOS DE JARANDILLA DE LA VEGA (CÁCERES)"

 

Sandra Varela exporta por España a calidade alimentaria do comedor escolar do CEIP Os Muíños

                                                        Sandra Varela en Jarandilla de la Vera

Cando dicimos que son vangarda en gastronomía, non só o dicimos por termos o Mellor Almorzo Boutique de España ou por ter levado polas feiras os nosos produtos máis senlleiros. Dicímolo porque tamén temos uns Comedores Escolares que son vangarda.

Certo que levamos anos intentando sacar adiante o proxecto “Comedores Responsables KM 0”, unha iniciativa coordinada polo GDR que trata de conectar produtores locais cos comedores escolares. E certo que non dá arrincado pola falta de compromiso de certos elementos necesarios.

E iso que na comarca temos profesionais que están á vangarda da gastronomía ecolóxica. Sandra Varela, membro da rede Red Chef 2030, leva décadas convertindo o comedor escolar do CEIP Os Muíños nun verdadeiro tesouro. Apostando polos produtos locais é un dos poucos Comedores Escolares de km.0 de toda Galicia.

Varela levou toda esa experiencia ás Xornadas de Restauracón Colectiva e Canales Cortos de Jarandilla de La Vega en Cáceres, á que foi invitada como poñente para debullar o seu exemplo de comedor sostible, economía circular e boas prácticas na cadea alimentaria.

A pontecesá ademais repasou as esixencias do novo Real Decreto 315, que a partir do 15 de abril terán que cumprir todos os comedores. Unha normativa vinculada precisamente coa sostibilidade, a calidade e o produto de temporada e de proximidade que xa cumplen a “raja tabla” no comedor escolar muxián, pero que vai ser un desafío para moitos outros centros. Precisamente moitos colexios están buscando asesoramento para cumplir esa normativa.

Varela, ademais de participar en varios talleres, tamén fixo unha acción directa. Man a man co alumnado deo FP de Cociña do IES de Jarandilla, realizaron un menú típico dos que se come nos Muíños con crema de brécol e cabaza con aceite de millón; lasaña de lentellas con salsa de temporada; e ensalada de temporada, todos con produtos da comarca. Había xentes de toda España,… agricultores, produtores, cociñeiros… “E a verdade todos quedaron encantados, o que sempre supón un chute de enerxía”, recoñece a cociñeira.

OBRADOIRO DE COCIÑA: 6º EP ELABORA... HAMBURGUESAS!

O pasado 19 de xaneiro, o alumnado de 6º EP participou nun obradoiro de cociña no comedor escolar. Guiados polas directrices da nosa cociñeira, Sandra, os nenos e nenas puxéronse mans á obra para elaborar hamburguesas caseiras, sen ningún tipo de aditivo, que posteriormente se cociñaron e serviron no xantar dese mesmo día.

Durante a actividade, o alumnado non só coñeceu de primeira man a importancia dunha alimentación saudable e responsable, en liña cun dos Obxectivos de Desenvolvemento Sustentable da Axenda 2030, senón que tamén traballou valores fundamentais como a cooperación, o respecto e o traballo en equipo. Foi unha experiencia práctica, divertida e moi saborosa, que lles permitiu aprender facendo e compartir unha tarefa conxunta nun ambiente de colaboración.

Desde o comedor escolar queremos felicitar ao alumnado pola súa implicación e agradecer a Sandra a súa dispoñibilidade e bo facer. 

Sen dúbida, unha xornada para repetir! 

CHEGARON OS REIS...

 

Coa volta ao cole, atopamos un agasallo no comedor escolar que deixaran os Reis Magos da Casa Grande de Xanceda.

Trátase dun kit co que poderán fabricar unha casiña para que os paxaros se refuxien e críen os seus poliños. Ademais, tamén inclúe acuarelas para decoralo ao seu gusto.

O noso agradecemento á Casa Grande de Xanceda por fomentar o coidado do medioambiente á vez que a creatividade.

XI MOSTRA DE ELABORACIÓN DE MENÚS

Coma todos os anos no mes de outubro, organizamos unha xornada de portas abertas no comedor escolar. 

Nesta actividade, na que sempre contamos coa colaboración de Sandra, a cociñeira, amosáronse os produtos para a elaboración do menú do día (todos eles de proximidade, frescos e de tempada), explicouse a vantaxe da utilización destes produtos fronte aos envasados e a cantidade de azucre que conteñen os procesados. Para finalizar as familias degustaron arroz integral con verduras de tempada, garavanzos con acelgas e cenoria, pasta con salsa de remolacha, cenoria con humus de garavanzo e iogur ecolóxico.

 

COS PÉS NA TERRA. SOPA DE MELÓN

Rematamos cos obradoiros de cociña dentro do Proxecto Documental Integrado deste curso: "Cos pés na terra". Nesta ocasión o alumnado de 1º e 2º EP elaborou con Sandra sopa de melón. 

Comezamos por nomear os ingredientes e saber as cantidades necesarias para facer a sopa, logo veu o proceso de trocear e mesturar, e por último degustar.

Aquí deixamos unha mostra do traballo:

COS PÉS NA TERRA. CHÍCHAROS E XUDÍAS

Continuamos desenvolvendo actividades en torno ao tema anual "Cos pés na terra". Nesta ocasión foi o alumnado de Infantil quen desenvolveu as súas destrezas no comedor pelando chícharos e troceando xudías. 

Unha forma moi amena de traballar a psicomotricidade fina.

Aquí queda unha mostra da tarefa realizada. Bo proveito!