No pasado mes de novembro desenvolvéronse en Cee unhas xornadas para promocionar a economía azul nas zonas pesqueiras, que engloba a pesca responsable, a gastronomía Km 0 e o turismo sostible.
Na charla-coloquio organizada na Casa da Cultura de Cee participou Sandra Varela, a nosa cociñeira, como representante deste gremio dentro de Slow Food Compostela apoiando coa súa experiencia a sustentabilidade e o produto Km 0.
Continuamos desenvolvendo actividades en torno ao tema anual "Cos pés na terra". Nesta ocasión foi o alumnado de 5º EP quen desenvolveu o seu nivel competencial no comedor elaborando con Sandra unha pizza vexetal.
Utilizando a ficha técnica deste prato e apoiándose nas matemáticas para pesar, na xeografía para coñecer a procedencia dos ingredientes, e nas linguas para usar o vocabulario específico dos útiles de cociña conseguiron elaborar as pizzas que se serviron como primeiro prato do menú dese día. Iso si, sempre traballando de xeito colaborativo en equipo para obter o produto final.
Aquí queda unha mostra da tarefa realizada. Bo proveito!
